August ni 9 zan
By : Danny patawn
8, Jan 2011
Pu Bil Hnok nih kumthum chung a sak mi a inn cu ai limcang. Inthar luh puai tuahnak ding ah khuachung nungak tlangval hna cu an mah le an ti khawh tawk cio ttuan vo la in buai cur in an um hna. Tar upa cheukhat pawl cu haar mei kam ah Uico rual he... Changvut a deng na, fang su na, fang khei na tiin an i manh lo ngai hna.. Cu lio ah a lu a fak lo nain Pavuah in a lu ai tteem mi tlangval cheukhat zong nungak pawl fangsuk nak kam ah ttingttang a rak tum na, nungak helh lei i a rak i la mi zong cu rak um asi.. Kulh Thio te pawl nih zan puai tik i, biachim thawtnak ding zu kawl ah lo lamkal hlah maw an thlauh ti awk in khualu khuataw an cul.
A zan cu in tlumlo in khuami an chuak.. Inthar luh nak phung chim tu ah Pu Bil Hnok i a kawi pu Rual Pum, hramthok thla cam ah nubu upa pi Dar Bong, zapi ca thlacam ah an krifa upa pu Buan Khirh, donghnak thla cam ah Herh Tial ( a nih hi pa asi ko nain, thiam tah, thil phiar le nu hnifenh hna a hmang pah tawn i,pi or pu tiah ttial awk an i laklawh i a min lawng in an tial) Pumh dih hnu social hruaitu ah Khup Thleng, lakphak ti lei tuanvo la tu ah nungak Tha ciak, nungak Val zi solo satu ah leng Hniar Hlei tiin tlamtling taktak in can cu i thiah asi..
Thlacam pumhnak an thok pah cang.ZBC hla : lomhnak thlam ka lung chung ah a um timi hla ngol hngal lo in an sa. An i nuam hringhran hna. Hramthok nak pi Dar Bong thlacam le bang cu an vok le an uico, an arfa, an hleihlak,an lungthu, ca tiang in cam kaw, a sauh ning cu a mak. Tar cheukhat cu an rak ngu manh cang. Tlawmpal ah phungchim can a hung phan. Pu Rual Pum a tthut nak in a hung tho. Bia hmanh a chim hlan ah tlangval cheukhat an hmai a chia.Phungchim a sau tuk lai ti a phangmi an lo. Nungak cheukhat nih hei met pah hna sehlaw a lo ngai. Tuzan an phung chimtu hi biachim ah a donghnak tuah a thiam lomi si i, cu ruang ah asi men lai. Bia hmanh chim hlan ah nungak pawl i an met manh hi......
Phungchimtu Bible cang thim : Rom 5: 1 - Atu cu zumhnak thawng in thiam coter kan si caah kan
bawipa zisuh thawng in pathian he kan i rem.
Cang tar : DAWT NAK
Pu Rual Pum nih hiti hin chim hram a van thok.. Tuzan ka Bible cang tar hi dawtnak kong asi . Hawi bang biachim thiamlo le mihrut nga mi ka si caah a ruah zia nan ka thiam nak lai zangfah kan nawl hna..Ka hngak chiat lio in dawtnak kong hi an chim a tu tiang. Ka hna ah a khat tuk, a nor in a ka nor cang. Voksa simh in a ka simh. A chim lawng chim lengmang i nun pi ttung lo ah.... kan hnulei ah kawm ka phur, a ka neh tuk, a hohmanh chawngtu ka tong lo. Khuasik lio ah ka ngal vialte an phi, ka kedil vialte an kak, kal kholo tiang in zohtu zong ka nei lo.Cu nih cun maw dawtnak e zei e nan ti ? Tlangvalpawl nih khawzei hawi hlei thil ti kho bang nan duh poh in zu nan ri,nan au nan khuang, duh tu pakhat zong neih khawh ttung lo ah.. Nungak pawl nih le nan mi meet tthawn lawng. Hihi maw dawtnak ? Phung hmanh ka chim hlan ah zei maw ti zoh in nan ka zoh hihi maw dawtnak ? .....Cu vial ah cun mipi an i ceih supmap hna. A bible relmi ah dawtnak kong pakhat hmanh ai tel lo, a cangtar ah dawtnak ai tar fawn , aikeih lo kho tuk an ti. A cheu nih a nih phungchim cu asi lai kan ti ttheu . Inthar luh zan hna i, a mah celngel phung chim thiah hna hi tiah nu pawl zong an zai len manh cang...
Cang tar : DAWT NAK
Pu Rual Pum nih hiti hin chim hram a van thok.. Tuzan ka Bible cang tar hi dawtnak kong asi . Hawi bang biachim thiamlo le mihrut nga mi ka si caah a ruah zia nan ka thiam nak lai zangfah kan nawl hna..Ka hngak chiat lio in dawtnak kong hi an chim a tu tiang. Ka hna ah a khat tuk, a nor in a ka nor cang. Voksa simh in a ka simh. A chim lawng chim lengmang i nun pi ttung lo ah.... kan hnulei ah kawm ka phur, a ka neh tuk, a hohmanh chawngtu ka tong lo. Khuasik lio ah ka ngal vialte an phi, ka kedil vialte an kak, kal kholo tiang in zohtu zong ka nei lo.Cu nih cun maw dawtnak e zei e nan ti ? Tlangvalpawl nih khawzei hawi hlei thil ti kho bang nan duh poh in zu nan ri,nan au nan khuang, duh tu pakhat zong neih khawh ttung lo ah.. Nungak pawl nih le nan mi meet tthawn lawng. Hihi maw dawtnak ? Phung hmanh ka chim hlan ah zei maw ti zoh in nan ka zoh hihi maw dawtnak ? .....Cu vial ah cun mipi an i ceih supmap hna. A bible relmi ah dawtnak kong pakhat hmanh ai tel lo, a cangtar ah dawtnak ai tar fawn , aikeih lo kho tuk an ti. A cheu nih a nih phungchim cu asi lai kan ti ttheu . Inthar luh zan hna i, a mah celngel phung chim thiah hna hi tiah nu pawl zong an zai len manh cang...
Pu Rual Pum nih a cangtar DAWTNAK kong chim ai timh mi hmanh a kheng rihlo, tthenkhat phungchim nak in a sau deuh manh cang. Peh cuahmah dawh asi . Ule nau hna, Pakistan ram, Japan ram, America ram, Germany ram pawl vialte khi a thei lo tiah maw ka ruat lai u cih, hlan ah ka pu nih a rak ka chimh dih ciami an si cuh. Ni kum ka mang zong ah ka pal dih ciami an si. A theilo zoh in rak ka zoh hlah u ca. Nan theih mi zat cu ka theih ve ko lai dahkaw ,, Cu vial ah cun a kil nawn ah a tthu mi tarnu te nih America, Japan ram le dawtnak cu ai sain ttunglo hme ! Pu Rual Pum ?
Pu Rual Pum nih a phung chim hiti hin a peh rih ......Leng Cer pi te chung dawtnak nan neih ah cun nan hleihlak kha ttha tein rak remh uh, kan hnungzan nan in ka rat ah ka tla khah ! Pu Khuai Ling , dawtnak na neih ah cun na uico ttha tein rak veng hna ! Nizanah seh ding in an ka dawi ciammam le ka zamnak ah ka hni zong a tlek viar. Pu Khuai Ling , dawtnak na neih ah cun na vokpi ttha tein rak veng, ka dum a bauh viar cang khah. Pi Phong cin zong kha i theih ter lo in um hlah, na meheh kha that viar hna. Ka hua tuk cang hna , ka bawnbok le ka antam nih an celh hna lo , na meheh pi farual mui hmuh ka fih ! Dawtnak kong phung chimmi ah cun a cian bik a si theu lai.
Zan nazi 12 asi cang nain, Pu Rual Pum nih a cangtar Dawtnak konga sermon rihlo. Zinglei tiang maw chim ai timh hnga zeidek hngal hlah! Phungchim ngai mi zapi cu an i dok merh len cang hna. Kulh Thio hawi hna cu zu rak i za pah kaw, a ngut nak ah a to nak in ttuang lai ah a tla. Tar cheukhat hna cu an i hngilh tuk ah Japan ram a tlawng mi zong an um len cang . Phungchim sauh tuk ruang ah inka i a lut chuak mi cu rel cawk ding an si ti lo. A cheu cu mitkuh celh lo ah inleng thlikik an i chem ter . A cheu biasawng an tlorh. . Nungak tthenkhat nih an mit sensen in an meet. A mui le a sam hrim te hi phung chim sau dawh asi an ti. An zai len zong ah zei hlei hlah. Ai pum mi a zat ceo cu an celh tilo i, leng ah an um viar. Nutung cheu khat nih tuzan kan phungchim tu Rual Pum hi a min let ding asi an ti. Rual khuai ti ding asi, rual a pumh nemmam tung lo, a tthio dih ko hna hi teh an ti. A thli tein an i ceih sepmap hna.... Cu thawng cu pu Rual Pum nih cun thei kaw, Rual khuai in a min hi let ding nan hei ka ti , phung chim hi a fawi te ah maw nan ruah ? Nal tuk hin bia hi chim hlah uh,, rak chim ve u ca,
kha ka tthut bantuk ah khan maw nan rel ?....Nungak Val Zi nih a hawi nu a hei sih pah khin, tuzan kan phung chimtu hi a ho nih zei an ka ti, ti bang a thin pei biatak tein a hung ko hi !...
Zanttim asi cang. Pu Rual Pum nih a phungchim a ngol rihlo. Mipi an si a vang. A nupi le a fale nih mi hmai an khap tilo. An pa cu an mit sensen i an meet chih zong ah, a biachim a thaw chin lengmang hlah maw ti awk in. . Phung chim ding i a dir ah tlang val pawl an hmai a chiat ning le nungak pawl i an meet colh mi kha mah lai hi an rak hngalh cia ruang ah si dawh asi. Pu Rual Pum hi Bible theih tuk ruang le vawlei cung thil sining theih tuk ruang ah a phungchim sauh bia silo in a donghnak tuah a thiam lo ruang ah ngol hngal lo in phung a chim nak hi si dawh asi. An nu ai tuar tilo i, a hung dir. Ule nau hna, cu ngai fah zelzul cu,, ka ningzah ka celh tilo.. Kan pa phung chim cu hi ti theu hin a si le kei mah nih a donghnak tuah ko ne ning. Thaizing hmanh ah a ngol ti lailo. A cangtar kha dawtnak kong asi ko nain, pakhat hmanh a kheng lo. A nganh viar. Nain a ttha mi hnihkhat a um ah cun pathian nih kan zapi caah thlawchuah kan pek piak ko seh tiin donghnak an nu nih a tuah piak i a ngol..
.Pumh dih cun mino hna nih puai cu an peh tthan. Pi Dar Bong hramthok nak thlacam lio hmanh i a ngu mi Chia Thang te pawl cu puai ti cang ah cun an vikvak tthat ning. Pu Rual Pum phungchim lio i, dawhmerh le zai lawng a rian mi nungak tthen khat pawl zong an hmai ah lomhnak muihmai a leng cang. Phung chim lio ah tthut dan in a tla mi Kulh Thio zong a hir ha zan ning cu a mak !Cu ti cun sunglawi ngai in inthar cu an lawm hna. Khua a hung tlai cun an za tein hla an sa. Ngaih a nuam i,mi lung an hlau. Zan tlai hnu nungak tlangval hna hlasak thawng cu van mi hlasak thawng hlah maw ti awk khin...Zan kih nak nih a tuam mi Judea ram Behtlehem ah..... "A sang bik van ah khin pathian cu thangthat sisehlaw, a dawtmi hna umnak vawlei ah remnak leng ko seh." tiah vanmi thiang hna hlasak thawng kha an hluan.....
Ni le thla an liam i, kum le can an thar .Cu hlan ah a ruah awk ka rak hngalh ballo mi August 9 zan cu chanchung philh khawh lo ding mi zan ah a cang thai cang lai. Zei ca tiah sunglawi ngai in inthar ka luh zan asi !. Inthar luh zan ah hin catialtu pumpak in ka rak i tel tawn i, zei tluk in dah a sunlawi tawn kha ka philh lo. Hawikom dawt hna le khua nu khua pa , tar in hngakchia tiang an tling. Nungak tlang val fangsuk , changvut den thawng le zantlai hnu hlasak thawng hna kha thinlung mitthlam ah a tu tiang an cam.
Nitlak lei tlang ka hei zoh i, cung nika pi cu liam a zal tthan cang. Inthar luhnak ding ah hawikom, chungkhat , ule nau,ka miphun hawi sawm can asi cang.Saduhthah bang hei si kho sehlaw, Cerlian ni liam rihlo in dir rih seh ti hi asi...A hodah ka sawm hmasa bik lai ? Hringtu ka nu.. cun ka unau, ka nifar,ka hawikom, ka miphun ... Thinlung in, hawi ka sawm cuahmah lio ah cun Cerlian ni a rak liam diam cang .. Tlawmpal ah zan muihnak nih a van ka khuh. Cu zan muihnak le thlizil kik tang ah a ttil mi hnah chawl tang ah dir in,hawikom dawtu vialte ka hei sawm hna. Cu lio ah ka phan bikmi cu an rak ra kholo sual lai ti hi asi.....Zei ca tiah mahlawng cun inthar cu zei ti khin dah ka luh hnga !...
Zan nazi pa 8 asi cang. A hodah a rak pha hmasa bik lai tiah i ngaih ngai in inka hram ah ka dir. Hringtu ka nu asi lo ah ka far le ka hawikom an phan hmasa bik ttheu lai ka ti...Ka in a phan hmasa bik tu min, minchia tuk asi sual lai ti ka phang pah.Cu hlan ah vantthat timi hi ka nei ballo i tutan hi cu pathian dawtnak thawng in ka in a pha hmasa bik hi min ttha tete si hna sehlaw vantthat nak van ka phorh hna seh tiah ka lungthli khin... 1999 kum lio i ka hawitha Van Lian Ceu Thang, Tripura ram ka um lio i ka hawi Khaw Lian Thang, Manipur ka rak kal lio i ka khual tlawn hawi Van Cer Cin, Bangladesh ramri i, ka riantuan hawi Rual Ban lova ( a hohmanh nih tluklo mipa ), Thailand ram kuli kan rak ttuan lio i ka hawi pa Sang Lian Thang Cem, mah hna pawl hi rak pha hmasa bik hna seh tiah saduh ka that...
Tlawmpal ah inka kingh thawng ka theih, i ngeih ngai in ka van on. Kum zei mawzat ka hmuh tilo mi ka hawi hlun pathum an si. Ka mithmai cu a lawm ko nain ka thinlung a ttap. A hmasa bik pa hi a min ah Chia Khawm Thang, a pahnihnak hi mizo ka hawi Van Nei Ngai lova ( van a nei ballo mi pa ), a pathum nak pa cu Pha kanh ka hawi Buai Thang hna an si. An kut tlaih hmanh thei loin ngang ko in ka dir. An min pakhat hnu pakhat ka tuak ah ka saduhthah vialte an tlau viar. Hawikom hlun he i ton cu a sunglawi tuk ko nain, inthar luh zan ngelcel i hi hna pathum hmuh hmasat bik cu a poituk ti pin ah chap tthan ka duh rih. An thawngpang hmanh hal ti loin ka lu ka khun. Umm..... zeiti awk ttha ka ti i, ka van ka cau tthan ah cun an rak um tilo.. Ka mitthlam..?
Zan nazi 10 asi cang. Inka hram ah dir in liamcia can vialte ka ruat hna. A can ah ka nu, nang tal a tutiang na rat ballo ? Ka far le khawzei ah nan si dih ? Ka hawikom ttha khawzei ah nan um ? Ka miphun hawi a ho tal rat nan i timlo maw ?.....A liamcia mi can chung ah ka hawikom, ka miphun lung ka fahter nak hna a um sual hnga maw tiin ka diary pakhat hnu pakhat in ka rel duahmah hna. Nain um dawh asi lo.High school kan rak kai lio in nihin ni tiang ka hawikom vialte ka hlam dih tthan hna. A hohmanh ra loin umsual hna sehlaw zei tindah mah lawng cun inthar luhnak cu ka tuah kun lai ? tiah lung sivang in zan nazi 11 tiang inka hram ah ka dir....
Umm.... zei ti awk ttha nelo.Ka dirnak ah ka tha zong a ba cang. Zan zong a tlai cang. Ar zong an khuang deng cang lai.... Ka khan ah ngeihchia ngai in ka lut...Pu Bil Hnok inthar luh lio i minung vialte mitthlam ah an cuang. An nu i donghnak a tuahpiakmi pu Rual Pum phungchim lio hmanh kha ngaih a um tuk hringhran. Ka bizu chung i ka Bible ka van i lak i, Filipi 4 : 13 ka rel.
Thawnnak a ka petu Khrih thawng in thil zeipoh ka tuah khawh ko hna...( Filipi 4 : 13 .....)
A cung i bible cang ka rel dih in hi tihin thla ka cam. Bawipa, thawnnak na ka pekmi thawng in thil zeipoh ka tuah khawh ko hna. Atu ah hin ka unau, ka miphun, ka hawikom tha hna nih ka telpi kho hmanh hna hlah sehlaw ka tha a chia tilo. Zei ca tiah, na vancungmi hna nih an ka tel pi ko. Taksa in keimah lawng siko hmanh ninglaw, thlarau mit in cun pakhat lawng ka si lo..vanmi hna nih ka inka an ka congh piak i, inthar an ka luhpi ko.A mahbelte, ka hmai i a ra dingmi can chung ah tuzan bantuk hin cun ka si ter ti hlah Bawipa tiin.......
A cung i bible cang ka rel dih in hi tihin thla ka cam. Bawipa, thawnnak na ka pekmi thawng in thil zeipoh ka tuah khawh ko hna. Atu ah hin ka unau, ka miphun, ka hawikom tha hna nih ka telpi kho hmanh hna hlah sehlaw ka tha a chia tilo. Zei ca tiah, na vancungmi hna nih an ka tel pi ko. Taksa in keimah lawng siko hmanh ninglaw, thlarau mit in cun pakhat lawng ka si lo..vanmi hna nih ka inka an ka congh piak i, inthar an ka luhpi ko.A mahbelte, ka hmai i a ra dingmi can chung ah tuzan bantuk hin cun ka si ter ti hlah Bawipa tiin.......
Thla ka cam dih ah cun zan suimilam 12 asi cang i, zanttim Ar an khuang . Peter nih Zisuh a hlawt lio i, arkhuan thawng kha hlah maw ti awk khin...Thlalang awng in cikkhat khua ka cuan. Nitlak lei tlangcung a phan cangmi zan thlapa, van arfi hna le zandai tang zilthli hna nih zei hngal loin liamcia caan an rak kirpi than......
Danny pa Tawn
